ភ្នំពេញ៖ ក្រសួងសុខាភិបាលបានក្រើនរំលឹកពលរដ្ឋប្រុងប្រយ័ត្នចំពោះជំងឺផ្តាសាយបក្សី និងជំងឺកូវីដ-១៩។ ទន្ទឹមនេះត្រូវបង្ការការពុលចំណីអាហារ ឬពុលស្រា-ស នាឱកាសបុណ្យចូលឆ្នាំចិនខាងមុខនេះ។
ក្រសួងសុខាភិបាលបានសង្កេតឃើញថា ពេលដែលមានពិធីសែនដូនតាផ្សេងៗ គឺមានពលរដ្ឋទិញបសុបក្សីជាច្រើនដែលអាចមានហានិភ័យនៃការចម្លងវីរុសផ្តាសាយបក្សីដែលមាននៅលើសត្វ និងនៅក្នុងបរិស្ថានឆ្លងទៅមនុស្សក្នុងករណីមិនមានការបង្ការត្រឹមត្រូវ។ ទន្ទឹមនេះការពុលចំណីអាហារ ឬពុលស្រាស ក៏តែងតែសង្កេតឃើញកើតមានឡើងនៅតាមតំបន់ ឬទីតាំងមួយចំនួនក្នុងប្រទេសផងដែរនោះ។
ហេតុដូច្នេះក្រសួងសុខាភិបាលបានក្រើនរំលឹកដល់ប្រជាពលរដ្ឋគ្រប់រូប ត្រូវបន្តការប្រុងប្រយ័ត្នផ្ទាល់ខ្លួន ប្រកបដោយស្មារតីទទួលខុសត្រូវខ្ពស់ ក្នុងការការពារសុខភាពពីការចម្លងវីរុសកូវីដ-១៩ ជាពិសេសពពួកអូមីក្រុងបម្លែងថ្មីៗ ជំងឺ ផ្តាសាយបក្សី និងជំងឺផ្សេងៗ រួមទាំងការបង្ការសុខភាពបណ្តាលមកពីការពុលចំណីអាហារ ឬពុលស្រាស នៅក្នុងការរស់នៅជាប្រចាំថ្ងៃ រដូវបុណ្យទាន ឬក្នុងពិធីសែនដូនតា។
ក្រសួងសុខាភិបាលបានណែនាំឱ្យអាជ្ញាធរមូលដ្ឋានត្រូវត្រួតពិនិត្យទីតាំងបិទស្រា ស ឬផលិតស្រាស ហើយអ្នករៀបចំ ឬអ្នកផលិតស្រាស ត្រូវធានានូវការអនុវត្តន៍តាមក្បួនបច្ចេកទេសត្រឹមត្រូវ ដោយមិនយកសារធាតុមេតាណុល មកលាយធ្វើជាស្រាស ផ្តេសផ្តាសនោះឡើយ។
ក្រសួងណែនាំឱ្យពលរដ្ឋដាច់ខាតមិនត្រូវទិញ ឬផលិត ឬបរិភោគស្រាស ដែលមិនមានប្រភពផលិតច្បាស់លាស់ ហើយមិនគោរពតាមបទដ្ឋានបច្ចេកទេសត្រឹមត្រូវ ឬយកមេតាណុលមកលាយធ្វើជាស្រាស ដែលបង្កឱ្យមានការពុលរហូតដល់ស្លាប់បាត់បង់ជីវិត។
ក្រសួងបានថ្លែងដូច្នេះថា៖ «សូមចៀសវាងការយកស្រាស ឬស្រាផ្សេងៗ ទៅលាយជាមួយស្រាផ្សេងទៀត ឬជាមួយភេសជ្ជៈណាមួយទៀត ដែលយើងមិន បានដឹងពីប្រតិកម្មរបស់វា ដែលបង្កឱ្យពុល និងអាចមានគ្រោះថ្នាក់ដល់អាយុជីវិតផងដែរ»៕